पिंपरी-चिंचवड महानगरपालिकेचा प्रभाग ६ हा सध्या प्रशासकीय दुर्लक्षाचा बळी ठरत आहे. ‘रेड झोन’ आणि ‘प्राधिकरण’ या तांत्रिक कात्रीत अडकलेल्या या प्रभागातील रहिवाशांकडून नियमित कर वसूल केला जातो, मात्र रस्ते, पाणी आणि ड्रेनेज यांसारख्या मूलभूत सुविधा पुरवताना महापालिका हात आखडता घेत असल्याचा संताप नागरिक व्यक्त करत आहेत.
१. पोल्टीकल वझीरच्या मते : मतदारांचे गणित
एकूण मतदार: ४१,२४८
स्त्री-पुरुष प्रमाण: पुरुष मतदार (२३,५७५) आणि महिला मतदार (१७,६७१)
आरक्षण: हा प्रभाग ४ जागांसाठी आरक्षित आहे: ‘अ-ओबीसी महिला’, ‘ब-ओबीसी’, ‘क-सर्वसाधारण महिला’ आणि ‘ड-सर्वसाधारण (खुला)’
२. या प्रभागामधील प्रमुख वस्त्या:-
या प्रभागाची सीमा मोठी असून त्यात खालील भागांचा समावेश होतो:
धावडे वस्ती, भगत वस्ती, गुळवे वस्ती, चक्रपाणी वसाहत, पांडवनगर, रोशल गार्डन परिसर आणि सद्गुरूनगर.
३. ग्राऊंड रिपोर्ट: “आम्ही कर भरतो, मग सुविधा कुठे आहेत?
प्रभागातील परिस्थिती पाहता नागरिकांच्या मागण्या अत्यंत रास्त आहेत:
रेड झोनचा अडथळा: मोहननगर आणि पांजरपोळ भागात ‘रेड झोन’मुळे नवीन विकासकामे आणि रस्ते बांधणीला ब्रेक लागला आहे. रहिवाशांना कर भरूनही नागरी सुविधा मिळत नाहीत.
रस्त्यांची दुरवस्था: चक्रपाणी वसाहतीकडे जाणाऱ्या रस्त्यांची चाळण झाली आहे. अंतर्गत रस्त्यांचे डांबरीकरण रखडल्यामुळे धुळीचा त्रास वाढला असून व्यापाऱ्यांचे नुकसान होत आहे.
वाहतुकीचा विळखा: धावडे वस्ती चौकात वाहतूक पोलीस नसल्यामुळे दररोज प्रचंड कोंडी होते. तसेच, मैदानावर खासगी बस पार्क केल्या जात असल्याने मुलांच्या खेळण्याचा प्रश्न निर्माण झाला आहे.
पाणी आणि ड्रेनेज: चक्रपाणी रोडवरील रहिवाशांना कमी दाबाने आणि अवेळी पाणीपुरवठा होतो. ड्रेनेज लाईन तुंबल्यामुळे सांडपाणी रस्त्यावर साचून डासांचा प्रादुर्भाव वाढला आहे.
४. विश्लेषण: प्रभाग ६ (पिंपरी-चिंचवड)
बळ:- पुणे-नाशिक महामार्गाला लागून असलेला मोक्याचा औद्योगिक आणि निवासी परिसर
उणिवा:- महामार्गाचे रखडलेले रुंदीकरण आणि रेड झोनमधील तांत्रिक पेच
संधी:- ग्रेड सेपरेटर, पादचारी पूल आणि भुयारी मार्ग पूर्ण केल्यास वाहतुकीचा मोठा प्रश्न सुटू शकतो.
धोके:- वीजपुरवठा खंडित होणे आणि अस्वच्छतेमुळे नागरिकांचा लोकप्रतिनिधींवरील उडालेला विश्वास.
५. पोल्टीकल वझीरचा मास्टरस्ट्रोक:-
प्रभाग ६ मध्ये यावेळी ‘रेड झोन’ मधील नागरिकांची मते निर्णायक ठरतील. जो उमेदवार “सुविधा नाही तर कर नाही” या नागरिकांच्या भूमिकेला न्याय देईल आणि ‘भोसरी रुग्णालयाजवळील बंद मार्केट’ पुन्हा सुरू करेल, त्यालाच धावडे वस्तीची जनता कौल देईल.
