नागपूर महानगरपालिकेच्या भौगोलिक रचनेत सर्वात लहान असलेला प्रभाग ३८ (जयताळा-हिंगणा नाका) यंदा राजकीयदृष्ट्या सर्वात मोठा धमाका करण्याची शक्यता आहे. २०१७ मध्ये या प्रभागात काँग्रेसने वर्चस्व गाजवत सर्व जागा जिंकल्या होत्या, पण २०२६ च्या निवडणुकीत भाजपने या बालेकिल्ल्याला खिंडार पाडण्यासाठी कंबर कसली आहे.
१. राजकीय चढाओढ: वर्चस्व टिकवण्याची लढाई
या प्रभागात मुख्य लढत काँग्रेस आणि भाजपमध्येच होणार असल्याचे चिन्हे आहेत:
काँग्रेसचा बालेकिल्ला: प्रफुल्ल गुडधे यांच्या नेतृत्वाखाली काँग्रेसने येथे आपली पकड मजबूत ठेवली आहे. प्रफुल्ल गुडधे यांनी मागील निवडणुकीत भाजपच्या उमेदवारांना मोठ्या फरकाने धूळ चारली होती.
भाजपचे ‘एन्ट्री’ प्लॅनिंग: या प्रभागात भाजपसाठी तिकीट मिळवण्यासाठी मोठी चढाओढ आहे. विशेषतः ओबीसी आणि अनुसूचित जातीच्या मतदारांची संख्या निर्णायक असल्याने भाजप येथे ‘सोशल इंजिनिअरिंग’चा वापर करण्याची शक्यता आहे.
काट्याची टक्कर: प्रफुल्ल गुडधे यांनी स्वतः निवडणूक लढवण्याऐवजी कुटुंबातील कोणाला संधी द्यायची, यावर चर्चा सुरू आहे, तर दुसरीकडे भाजपकडून माहेश्वरी पटले यांचे नाव आघाडीवर आहे.
२. प्रभाग ३८ मधील प्रमुख वस्त्या:-
या प्रभागाचा विस्तार मर्यादित असला तरी नागरी प्रश्नांचा गुंता मोठा आहे:
कल्याण नगर, जलतरण सोसायटी, वासुदेव नगर,शास्त्री ले-आऊट,अध्यापक ले-आऊट आणि शारदानगर , दुुबे ले-आऊट, हिरणवार ले-आऊट ,रमाईनगर टाकळी सिम, राजेंद्रनगर, हिंगणा नाका परिसर,जयताळा वस्ती, शिवणगाव भोसलेनगर, एकात्मता नगर, दाते ले-आउट आणि शास्त्री नगर वडस्कर ले-आऊट.
३. ग्राऊंड रियालिटी: ‘हाय-प्रोफाईल’ प्रभागातील ज्वलंत प्रश्न
प्रभागातील नागरिक खालील समस्यांमुळे त्रस्त असून निवडणुकीत हेच कळीचे मुद्दे ठरतील:
जयताळा बाजाराची दुर्दशा: जयताळा बाजारात योग्य जागा नसल्याने विक्रेते आणि ग्राहकांना मोठा मनस्ताप होतो. रस्त्यावरच बाजार भरत असल्याने वाहतुकीची मोठी कोंडी होते.
सार्वजनिक सुविधांचा अभाव: प्रभागात सार्वजनिक शौचालयांची मोठी कमतरता आहे. तसेच, प्रभागाचा विस्तार मोठा होऊनही पुरेसे उद्यान आणि क्रीडांगण विकसित झालेले नाही.
अतिक्रमण आणि अनधिकृत झोपड्या: अनेक ठिकाणी झाडे कापून अनधिकृत झोपड्या वसविल्या जात असल्याच्या तक्रारी आहेत.
गुन्हेगारी आणि सुरक्षा: हिंगणा नाका आणि जयताळा परिसरात गुन्हेगारीचे प्रमाण वाढत असून पोलिसांचे नियंत्रण नसल्याची भावना रहिवाशांमध्ये आहे.
वाहतूक कोंडी: जयताळ्याकडे जाणाऱ्या वळणावरील रस्ता अरुंद असल्याने येथे अपघातांचे प्रमाण वाढले आहे.
४. जुने निकाल/ इच्छुक यादी:-
२०१७ चे विजयी शिलेदार (काँग्रेस):
उज्वला बनकर, प्रफुल्ल गुडधे आणि प्रणिता शहाणे
भाजपचे इच्छुक: माहेश्वरी पटले, प्रणिता गुडधे, सपना हिरणवार, राजेंद्र वानखेडे, राजेश मेश्राम आणि अजय उके
काँग्रेसचे इच्छुक: सागर बनकर, कुमुद गुडधे, शैलेंद्र ढोरे, शिवराज नितनवरे आणि विकास बनकर.
‘पॉलिटिकल वझीर’चे मत:
प्रभाग ३८ मध्ये केवळ ‘काँग्रेसच्या लाटेवर’ विसंबून चालणार नाही. येथील मतदार आता जयताळा बाजाराचे पुनर्वसन आणि वाहतूक कोंडीतून सुटका करणाऱ्या नेतृत्वाच्या शोधात आहे. ओबीसी आणि अनुसूचित जातीच्या मतदारांचे पाठबळ ज्याला मिळेल, तोच या बालेकिल्ल्याचा नवा नेता ठरेल.
