नागपूर महानगरपालिकेचा प्रभाग ३७ हा नागपुरातील एक अतिशय महत्त्वाचा आणि सुशिक्षित वस्ती असलेला प्रभाग आहे. गेल्या निवडणुकीत येथे भाजपचे वर्चस्व होते, मात्र यंदा काँग्रेसने या बालेकिल्ल्यात भगदाड पाडण्यासाठी कंबर कसली आहे. या प्रभागाची सर्वात मोठी ताकद म्हणजे येथील राजीव गांधी उद्यान आणि दीनदयालनगरमधील योगाभ्यासाची संस्कृती, जी संपूर्ण शहरात चर्चेचा विषय असते.
१. पोल्टीकल वझीरचा चष्मा: तिकीटासाठी चढाओढ:-
आरक्षणाचा फेरा: या प्रभागातील काही जागा अनुसूचित जातीच्या महिलांसाठी आरक्षित झाल्यामुळे दिग्गज पुरुष उमेदवारांची कोंडी झाली आहे. माजी नगरसेवक प्रमोद तभाने यांच्यासारख्या नेत्यांना आता प्रभागाबाहेर किंवा नवीन जागेचा विचार करावा लागत आहे.
काँग्रेसची ‘बिग फाईट‘: आमदार विकास ठाकरे यांचा हा प्रभाव क्षेत्र असलेला भाग असल्याने काँग्रेस येथे विजयासाठी सर्वस्व पणाला लावणार आहे.
बसपाचे आव्हान: गेल्या निवडणुकीत बसपाने ७ ते ८ टक्के मते घेतली होती, जी निर्णायक ठरू शकतात.
२.प्रभागामधील प्रमुख वस्त्या:-
या प्रभागात मध्यमवर्गीय आणि काही झोपडपट्टी भागांचा समावेश होतो
प्रमुख वस्त्या: सुभाषनगर, कामगारनगर, बंडू सोनी ले-आऊट, गोपालनगर, पारसोडी, प्रतापनगर, अत्रे ले-आऊट, आर.पी.टी.एस. परिसर, तात्या टोपेनगर, श्रद्धांनदपेठ, जगदीश नगर, टेलिकॉम नगर, जीवन छाया सोसायटी, स्वरूपनगर, स्वावलंबीनगर आणि दीनदयालनगर
३. निवडणुकीच्या आखाड्यातील ‘योद्धे’ :-
दोन्ही पक्षांतर्फे इच्छुकांची यादी मोठी आहे
काँग्रेस: प्रसन्ना बोरकर, प्रशांत कापसे, पंकज निघोट, मंगेश कामोणे, प्रज्ञा राकेश पन्नासे, गडफने , मालती कापसे, मधू विनय राऊत, राहुल जगताप, आणि स्मिता उत्तम सोमुकवर.
भाजप: वर्षा उगले, नितीन महाजन, शालिक कडू, सोनाली कडू, गोपाल बोहरे, पारेंद्र पटले, दिलीप दिवे, विवेक मेंढी, विवेक तरासे, नंदा जिचकार, अश्विनी जिचकार, वर्षा ठाकरे, वर्षा चौधरी, अनसूया गुप्ता, आणि ॲड. सविता कांबळे.
४. जनतेचा जाहीरनामा: उद्यानांच्या पलीकडील समस्या:-
बाहेरून सुंदर दिसणाऱ्या या प्रभागात आतल्या बाजूला अनेक समस्या आहेत
रस्त्यांची दुरवस्था: लहान वस्त्यांमध्ये आजही रस्त्यांचे काम अर्धवट असून नागरिकांना मोठा त्रास होतो.
पार्किंग आणि अतिक्रमण: हॉटेल आणि दुकानांमुळे मुख्य मार्गांवर पार्किंगची समस्या गंभीर झाली आहे. फूटपाथवर दुकानदारांनी अतिक्रमण केल्याने पादचाऱ्यांना चालणे कठीण झाले आहे.पावसाचे पाणी: पडोळे चौकात पावसाळ्यात पाणी साचण्याची समस्या अनेक वर्षांपासून कायम आहे.
मोकाट कुत्रे: परिसरात मोकाट कुत्र्यांचा वावर वाढल्याने नागरिकांमध्ये विशेषतः लहान मुलांमध्ये भीतीचे वातावरण आहे.
५. प्रभाग ३७ विश्लेषण:
बळ:- उच्चशिक्षित मतदार आणि उद्यानांमुळे निर्माण झालेली प्रभागाची चांगली प्रतिमा
उणिवा :- पावसाळ्यातील पाणी साचणे आणि पार्किंगच्या समस्यांकडे झालेले दुर्लक्ष
संधी:- काँग्रेससाठी आमदार विकास ठाकरे यांच्या प्रभावामुळे पुनरागमनाची संधी
धोके:- आरक्षणाच्या बदलामुळे निष्ठावंत कार्यकर्त्यांची होणारी बंडखोरी भाजपसाठी धोक्याची ठरू शकते.
राजकीय वझीरचा ‘मास्टरस्ट्रोक’ :-
प्रभाग ३७ मध्ये मतदार अतिशय जागरूक आहेत. जो उमेदवार ‘पार्किंगच्या समस्येवर कायमस्वरूपी तोडगा’ आणि ‘पडोळे चौकातील पाण्याचा निचरा’ करण्याचे नियोजन मांडेल, त्यालाच दीनदयालनगर आणि प्रतापनगरची जनता कौल देईल.
